We TV Cambodia

ក្រុមហ៊ុនជប៉ុនធំមួយនឹងទិញភាគហ៊ុន ៧០% ពីគ្រឹះស្ថានមីក្រូហិរញ្ញវត្ថុ លី ហួរ ក្នុងតម្លៃជាង $80 លានដុល្លារ

រូបថតៈ គ្រឹះស្ថានមីក្រូហិរញ្ញវត្ថុ លី ហួរ

ដោយៈ ទិន សុខាវុធ

ថ្មី​ៗ​នេះ សារព័ត៌មាន​ជប៉ុន NNA Business News បាន​ចុះ​ផ្សាយ​នូវព័ត៌មាន​មួយ​​បញ្ជាក់ថា ក្រុមហ៊ុន​ហិរញ្ញវត្ថុ​ជប៉ុន​ដ៏​ធំ​មួយមានឈ្មោះ​ថា SBI Holding Inc. បានប្រកាសថា ពួក​គេនឹងទិញ​ភាគហ៊ុន​ចំនួន ៧០% ពី​ស្ថាប័ន​មីក្រូហិរញ្ញ​វត្ថុ​កម្ពុជា លី ហូរ ក្នុង​គោលបំណងហក់​ចូល​ក្នុង​ទីផ្សារហិរញ្ញវត្ថុ​កម្ពុជា​​ជា​ថ្មី បន្ទាប់ពី​ក្រុមហ៊ុន​សារជីវកម្មមួយ​នេះ បានដកខ្លួន​ចេញពី​ទីផ្សារ​ហិរញ្ញវត្ថុ​កម្ពុជា កាលពី​ឆ្នាំ ២០១៦ កន្លង​ទៅ​នេះ​។

សារព័ត៌មាន​ NNA Business News បាន​បន្ថែម​ទៀត​ថា ស្ថាប័ន​មីក្រូហិរញ្ញវត្ថុ​កម្ពុជា លី ហួរ រំពឹង​ថា​នឹង​ទទួល​បាន​អាជ្ញាប័ណ្ណ​ពី​ធនាគារ​ជាតិ​នៃ​កម្ពុជា ក្នុង​ពេល​ឆាប់​ៗ​នេះ ដើម្បី​ពង្រីក​សេវាកម្ម​មាន​ស្រាប់​ នៅ​កម្ពុជា​ នៅ​ពេល​បច្ចុប្បន្ន​នេះ​។

ក្នុង​ដំណាក់កាល​ដំបូង ក្រុមហ៊ុនជប៉ុន SBI នឹង​ទិញ​យក​​ភាគហ៊ុន​ចំនួន ១៤.៩៤ លាន​ភាគ​ហ៊ុន​ ពី​គ្រឹះស្ថាន​មីក្រូហិរញ្ញវត្ថុ លី ហួរ នៅ​ត្រឹម​ថ្ងៃ​ទី ២៥ ខែ វិច្ឆិកា ឆ្នាំ ២០១៩ ដើម្បី​អាច​មាន​សិទ្ធិ​ប្តូរ​ឈ្មោះគ្រឹះស្ថានមីក្រូហិរញ្ញវត្ថុ​ លី ហួរ អោយ​ទៅ​ជា SBI Lyhour Bank PLC វិញ​។

ដំណាក់កាលបន្ទាប់មកទៀត ក្រុមហ៊ុន​ជប៉ុន SBI នឹង​ទិញ​យកភាគហ៊ុន​ពី​ លី ហូរ ចំនួន  ៣៧.៥៦ លានភាគ​ហ៊ុន​ទៀត នៅត្រឹម​ថ្ងៃ​ទី ២៣ ខែ ធ្នូ ឆ្នាំ ២០១៩ ។

ជា​លទ្ធផល ក្រុមហ៊ុន SBI នឹងមាន​សិទ្ធិកាន់កាប់​ភាគហ៊ុន​របស់​គ្រឹះស្ថាន​មីក្រូហិរញ្ញវត្ថុ លី ហួរ ចំនួន ៧០% គិត​ជា​ទឹក​ប្រាក់​សរុប​ចំនួន $81.7 លាន​ដុល្លារ​​។ ហើយ​ធនាគារជាតិ​នៃ​កម្ពុជា​បាន​យល់ព្រម​ទទួលស្គាល់​ការទិញ-លក់​ភាគហ៊ុន​នេះ​​រួច​ហើយ​ កាលពី​ថ្ងៃ​ទី ៩ តុលា ឆ្នាំ ២០១៩ កន្លងទៅ​នេះ​។

គ្រឹះស្ថាន​មីក្រូហិរញ្ញវត្ថុ លី ហួរ ទទួល​បាន​ចំណាត់​ថ្នាក់​លេខ ៨ នៅ​ក្នុង​ចំណោម​គ្រឹះស្ថានមីក្រូហិរញ្ញវត្ថុ​ទាំងអស់នៅកម្ពុជា បើ​គិត​ពី​ទ្រព្យ​សកម្ម​។

មួយវិញទៀត យោង​តាម​របាយ​ការណ៍​របស់​ធនាគារ​ជាតិ​នៃ​កម្ពុជា រហូត​មក​ដល់​ពេលបច្ចុប្បន្ន​នេះ ធនាគារពាណិជ្ជ​មាន​ចំនួន ៤៤ ធនាគារ​ឯកជន​មាន​ចំនួន ១៥ គ្រឹះស្ថាន​មីក្រូហិរញ្ញវត្ថុ​ទទួល​ប្រាក់​បញ្ញើ​ឯកជន​មាន​ចំនួន ៧ គ្រឹះស្ថាន​មីក្រូហិរញ្ញវត្ថុ​ចំនួន ៧៤ គ្រឹះស្ថាន​ឥណទានជនបទ​ចំនួន ២៥១ ក្រុមហ៊ុនភតិសន្យា​ហិរញ្ញវត្ថុ​ចំនួន ១៥ គ្រឹះស្ថាន​ផ្តល់​សេវា​ទូទាត់​ចំនួន ១៦ ការិយាល័យ​តំណាងធនាគារបរទេសចំនួន ៥ និងអាជីវកម្មប្តូរប្រាក់​ចំនួន ២,៧៩៩ ៕

Related Articles