We TV Cambodia

ក្រុមហ៊ុនជប៉ុនគ្រោងវិនិយោគលើការផលិតអំពូលភ្លើងវៃឆ្លាតបំភ្លឺផ្លូវសាធារណនៅកម្ពុជា

ដោយៈ ទិន សុខាវុធ

ក្រុមហ៊ុន MinebeaMitsumi មកពី​ប្រទេស​ជប៉ុន មាន​បំណង​ចង់​វិនិយោគ​ផលិត​អំពូល​ភ្លើង​វៃឆ្លាត (Smart LED) សំរាប់​បំភ្លឺ​តាម​ផ្លូវ​សាធារណ​នៅ​ក្នុង​មួយ​ចំនួន​នៅ​​កម្ពុជា​។

យោង​តាម​ទំព័រ Facebook របស់​ក្រសួង​សាធារណការ​និងដឹកជញ្ជូន កាលពីថ្ងៃ​ទី ១៤ ខែ តុលា ឆ្នាំ ២០១៩ កន្លង​ទៅ​នេះ លោក YOSHIHISA KAINUMA នាយកប្រតិបត្តិរបស់ក្រុមហ៊ុន Minebea Mitsumi បាន​ចូល​ជួប​សន្ទនា​ការងារ​ជាមួយ​លោក តូច ចាន់កុសល រដ្ឋលេខាធិការក្រសួងសាធារណការ និងដឹកជញ្ជូន ស្តី​អំពី​បំណង​​របស់​ក្រុមហ៊ុន ក្នុង​ការវិនិយោគ​ផលិត​អំពូល​ភ្លើង​វៃឆ្លាត​​ ដើម្បី​បំពាក់​អោយ​បង្គោល​ភ្លើង​បំភ្លឺ​តាម​ផ្លូវ​សាធារណ​​នៅ​តាម​តំបន់មួយ​ចំនួន​នៅ​កម្ពុជា​។

ជាការឆ្លើយ​តប លោក​រដ្ឋលេខាធិការ បាន​ស្វាគមន៍​ចំពោះ​បំណង​ល្អ​របស់​ក្រុមហ៊ុន​ជប៉ុន ក្នុង​ការជួយ​អភិវឌ្ឍ​ប្រទេស​កម្ពុជា​។ ហើយ​លោក​ក៏​បាន​សំដែង​នូវ​​​ការគាំទ្រ​យ៉ាង​ពេញ​ទំហឹង​ផង​ដែរ ​​ដល់​គំរោង​ផលិត​អំពូល​វៃឆ្លាត​នេះ​ និង​បានសន្យា​ថា​នឹង​ធ្វើ​អ្វី​ៗ​​គ្រប់យ៉ាង ក្នុង​គោលបំណងជួយ​អោយ​ក្រុមហ៊ុន​ជប៉ុន​ សំរេច​អោយ​បានចេញ​ជា​រូបរាង​នូវ​គំរោង​អភិវឌ្ឍន៍​មួយ​នេះ​។

យ៉ាង​ណាម៉ិញ បើសិន​ជា​​គំរោងផលិត​អំពូលភ្លើង​​វៃ​ឆ្លាតនេះ សំរេច​បាន​ជោគជ័យ ក្រុមហ៊ុន MinebeaMitsumi នឹង​បំពាក់​អំពូល​ប្រភេទ LED នេះនៅ​តាម​ដងវិថី​នៅ​ក្នុង​រាជធានី​ភ្នំពេញ ខេត្ត​សៀមរាប និង ខេត្ត​ព្រះសីហនុ ដែលជា​បណ្តា​ខេត្តត្រូវ​បានជ្រើសដោយ​រាជ​រដ្ឋាភិបាល​ជប៉ុន ក្នុង​ការអភិវឌ្ឍ​អោយ​ទៅ​ជា​ទីក្រុង​វៃ​ឆ្លាតនៅ​ក្នុង​តំបន់អាស៊ាន​។

បើអ្វីៗនឹងប្រព្រឹត្តដោយ​រលូន ក្រុមហ៊ុន MinebeaMitsumi នឹង​ដំឡើង​អំពូល LED សំរាប់​បង្គោល​ភ្លើង​ចំនួន​ ៧,៣៥៩ នៅ​ទូទាំង​ប្រទេស​កម្ពុជា​។

ក៏ប៉ុន្តែ​ទោះជា​យ៉ាង​ណា​ក៏​ដោយ ក្រុមហ៊ុន​បាន​ដំលើង​រួច​ជា​ស្រេច​ទៅ​ហើយ​នូវ​អំពូល​​នៅតាម​បង្គោល​ភ្លើង​ចំនួន ១,១៨៧ នៅ​ក្នុង​រាជ​ធានី​ភ្នំពេញ​។ ហើយ​នៅ​ពេល​អនាគត ក្រុមហ៊ុន​នឹង​តំឡើង​អំពួល​ភ្លើង​ប្រភេទ​នេះ​ សំរាប់​បង្គោលភ្លើង​ចំនួន ៥០០ ទៀត នៅ​ក្នុង​ខេត្ត​សៀមរាប​ និង​មួយ​ចំនួន​ទៀត​ ក្នុង​ខេត្ត​ព្រះ​សីហនុ​៕

Related Articles