We TV Cambodia

ក្រុមហ៊ុនចិនបោះទុន $10 លានដុល្លារ បង្កើតរោងចក្រផលិតជី​និង​ថ្នាំ​កសិកម្ម

រូបថតៈ Facebook ក្រសួងកសិកម្ម

ដោយៈ ទិន សុខាវុធ

ក្រុមហ៊ុន​ ហាម៉ីនីវីន អិនវេសមេន មកពី​ប្រទេស​ចិន​បាន​បោះ​ទុន​​ប្រមាណ​ជា​ $10 លាន​ដុល្លារ ​ដើម្បី​គ្រោង​សាង​សង់​រោង​ចក្រ​ផលិត​ជី​និង​ថ្នាំ​កសិកម្ម​មួ​យ នៅ​ក្នុង​ឆ្នាំ ២០២០ នៅ​លើ​ផ្ទៃ​ដី​សម្បទាន​សេដ្ឋកិច្ច​ចំនួន ១៥ ហិកតា​ នៅ​ក្នុង​​ឃុំ​ត្រពាំង​ព្រីង ស្រុក​តំបែ ខេត្ត​ត្បូង​ឃ្មុំ​​។

យោង​តាម​ទំព័រ Facebook របស់​ក្រសូង​កសិកម្ម​ រុក្ខា​ប្រមាញ់​ និង នេសាទ រោង​ចក្រនោះ​នឹង​ត្រូវ​សាងសង់​​ឡើង​ជា​ពីរ​ដំណាក់កាល​។ នៅ​ក្នុង​ដំណាក់កាលទី​មួយ រោង​ចក្រ​នោះនឹង​​ត្រូវ​បំពាក់​ដោយ​គ្រឿង​ម៉ាស៊ីន​ ដែល​មាន​សមត្ថភាព​អាច​ផលិតជី​និង​ថ្នាំ​កសិកម្ម​បាន​ចំនួន ៥ ម៉ឺន​តោន​ក្នុង​មួយ​ឆ្នាំ​។

បន្ទាប់​មក នៅ​ក្នុង​ដំណាក់​កាលទី​ពីរ រោងចក្រ​នឹង​ត្រូវ​បំពាក់​ដោយ​គ្រឿង​យ​ន្ត​បន្ថែមទៀត ដើម្បី​អាច​ផលិត​បាន​ជី​និង​ថ្នាំ​កសិកម្ម​ពីរ​ដង​ច្រើន​ជាង​មុន ពោល​គឺ ១០ ម៉ឺន​តោន​ក្នុង​មួយ​ឆ្នាំ​។

មួយវិញទៀត ដើម្បី​ធានា​អោយ​បាន​​នូវ​បរិមាណ​ក៏​ដូច​ជា​​​គុណភាព​ដ៏​សម​ស្រប​តាម​ស្តង់ដារ​បច្ចេកទេស ក្រុមហ៊ុន​នឹង​ធ្វើការ​សាកល្បង​ពិសោធ​​ការប្រើប្រាស់​​ជី​និង​ថ្នាំ​កសិកម្ម​របស់​ក្រុមហ៊ុន​ ទៅ​លើ​ដី​មួយ​ចំនួន​ជាមុខ​សិន មុន​នឹង​សំរេច​ផលិត​​ជី​និង​ថ្មាំ​កសិកម្ម​សំរាប់​លក់​អោយ​កសិករ​កម្ពុជា​ និង​សំរាប់​ការនាំ​ចេញ​។

ក្រុមហ៊ុន ហាម៉ីនីវីន អិនវេសមេន បាន​បោះទុន​វិនិយោគ​ក្នុង​គោល​បំណងបង្កើត​រោង​ចក្រ​ប្រភេទ​នេះ តាំង​ពី​​ឆ្នាំ ២០១៦ មក​ម្លេះ​។ បច្ចុប្បន្ន​នេះ​ ក្រុមហ៊ុន​បាន​ទទួល​ផ្ទៃ​ដី​​សម្បទាន​សេដ្ឋកិច្ច​ពីរាជ​រដ្ឋាភិបាល​មាន​ចំនួន​រហូត​ដល់​ទៅ​ ១,៣ ពាន់​ហិកតា​ឯណោះ​។ ហើយ​ផ្ទៃ​ដី​សល់​ពី​ការសាងសង់​រោង​ចក្រ ​ក្រុមហ៊ុន​នឹង​ប្រើប្រាស់​សំរាប់​ដាំ​ដំណាំ​កសិកម្មមួយ​ចំនួន​​ដូចជា ចេក ពោត និង ថ្នាំ​ជក់​ជាដើម​៕

Related Articles