ដោយ៖ពេជ្រ
ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ បានបើកកិច្ចប្រជុំមួយដើម្បីលើកស្ទួយសហគ្រាសធុនតូច និង មធ្យមលើកទី ១។ នេះបើតាមឯកឧត្តមអូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួង សេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការសកម្មភាពគោលនយោបាយ កាលពីថ្ងៃ១៥ កក្កដា ឆ្នាំ២០២០។
កិច្ចប្រជុំគណៈកម្មាធិការ សកម្មភាពគោលនយោបាយដើម្បីលើកស្ទួយសហគ្រាសធុនតូច និងមធ្យម លើកទី ១ គឺធ្វើឡើងដើម្បីពិនិត្យ និងអនុម័តលើសំណើវិធានការ ដើម្បីលើកស្ទួយសហគ្រាសធុនតូច និងមធ្យម (Small and Medium Enterprises – SMEs) សម្រាប់រយៈ ពេលបន្ទាន់, ខ្លី និងមធ្យម។
ឯកឧត្តម ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការនៃអគ្គលេខាធិការដ្ឋាន គណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ (គ.ស.ហ) បានបញ្ជាក់ឱ្យដឹងពី បញ្ហាប្រឈមដែលមានលក្ខណៈជារចនាសម្ព័ន្ធ និងជាប្រព័ន្ធអេកូឡូស៊ី ពិសេស ពាក់ព័ន្ធនឹងបន្ទុកអនុលោមភាព, ការអនុវត្ដបទប្បញ្ញត្ដិដែលនៅមិនទាន់ស៊ីចង្វាក់រវាងក្រសួង-ស្ថាប័នពាក់ព័ន្ធ និងភាពនៅមានកម្រិតក្នុងការផ្ដល់សេវាគាំទ្រធុរកិច្ច។
ឯកឧត្តមបន្ថែមថា បញ្ហាប្រឈមទី២គឺ សមត្ថភាព SMEs ក្នុងការគ្រប់គ្រងបច្ចេកទេស ផលិតកម្ម, ធុរកិច្ច និងហិរញ្ញវត្ថុនៅមានកម្រិតទាប និងទី៣ ការទទួលបានហិរញ្ញវត្ថុនៅមានគម្លាតធំ ។
សេចក្ដីសម្រាចក្នុងអង្គប្រជុំបានពិភាក្សា និងឯកភាពជាគោលការណ៍លើវិធានការលើកស្ទួយ SMEs ដោយគួររៀបចំជាពីរដំណាក់កាលដោយទី១ គឺវិធានការរយៈពេលបន្ទាន់ផ្ដោតលើការកាត់បន្ថយ និងសម្រួលនូវបន្ទុកអនុលោមភាពសម្រាប់សហគ្រាសធុនតូច និងមធ្យម, ។ បន្ថែមពីនេះគឺ ការពិនិត្យលទ្ធភាពក្នុងការផ្តល់សេវាកម្មគាំទ្រ ដូចជាប្រឹក្សាយោបល់ធុរកិច្ច, សេវាមេធាវី និងប្រឹក្សាច្បាប់, ការចុះបញ្ជី, គណនេយ្យ, ទីផ្សារ និងបច្ចេកទេស និង គ.ជំរុញការគាំទ្រ ការផ្ដល់ហិរញ្ញប្បទានដល់ SMEs តាមរយៈធនាគារសហគ្រាសធុនតូច និងមធ្យមកម្ពុជា និងធនាគារ អភិវឌ្ឍន៍ជនបទនិងកសិកម្ម។
ទន្ទឹមនឹងនេះ គឺអនុវត្តន៍វិធានការរយៈពេលខ្លី និងមធ្យម ផ្តោតលើការគាំទ្រជាប្រព័ន្ធអេកូឡូស៊ី រួមមាន ការបន្ដកំណែទម្រង់ក្របខ័ណ្ឌបទប្បញ្ញត្តិ និងការអនុវត្ដ, ការលើកកម្ពស់ សេវាគាំទ្រធុរកិច្ច, ការគាំទ្រហិរញ្ញវត្ថុ, ការលើកកម្ពស់ទីផ្សារ សម្រាប់ SMEs, ជំរុញ និងលើកកម្ពស់ធនធានមនុស្ស និង R&D, និងលើកកម្ពស់ផ្នត់គំនិតសហគ្រិនភាព ។
ឯកឧត្តមក៏បានសង្កត់ធ្ងន់ដែរថា ដើម្បីធានាបានប្រសិទ្ធភាពអនុវត្តន៍ ជាកិច្ចការបន្ត ត្រូវធ្វើការសិក្សាឱ្យបានជាក់លាក់ តាមរយៈការកំណត់នូវនិយមន័យ វិសាលភាព (Scope) ក៏ដូចជាផលរបរនៃ SMEs, លទ្ធភាពជ្រោមជ្រែងផ្នែកហិរញ្ញវត្ថុ ការរៀបចំលិខិតបទដ្ឋានគតិយុត្តិដែលប្រទាក់ក្រឡា ក៏ដូចជារៀបចំនូវសូចនាករវាស់វែង និងការ តាមដានការអនុវត្តន៍ជាអន្តរវិស័យ និងស្ថាប័នផងដែរ៕
ប្រភព៖វិទ្យុជាតិ
