We TV Cambodia

ក្នុងរយពេល ៩ ខែ កាស៊ីណូ NagaWorld រកប្រាក់​បាន $1.29 ពាន់លាន​ដុល្លារ

រូបថតៈ WE TV Cambodia/ Theara Thoeurn

ដោយៈ ទិន សុខាវុធ

យោង​តាម​កាសែត «ភ្នំពេញ​ប៉ុស្តិ៍» កាស៊ីណូ NagaWorld ដែល​បាន​ទទួល​សិទ្ធិ​ផ្តាច់​មុខ​ នៅ​ក្នុង​​ការបើកមុខ​របរ​លេង​ល្បែង​ស៊ីសងនៅ​ទីក្រុង​ភ្នំពេញ បាន​ទទួល​ប្រាក់​ចំណូល​សរុប​ប្រមាណ $1.29 ពាន់លាន​ដុល្លារ ក្នុង​រយពេល ៩ ខែ ដើម​ឆ្នាំ​នេះ​។

តួលេខ​នេះ​ត្រូវ​បាន​កាសែត​ ភ្នំពេញ​ប៉ុស្តិ៍
អះអាង​ថា​បាន​មក​ព្រឹត្តប័ត្រ​លើបណ្តាញ​​មួយ​មាន​ឈ្មោះ​​ថា « GGRAsia» ដែល​ជា​ព្រឹត្តប័ត្រ​ផ្សព្វផ្សាយ​ព័ត៌មាន​ទាក់ទង​នឹង​បណ្តា​កាស៊ីណូ​​ទាំងឡាយ​នៅ​ក្នុង​ទ្វីប​អាស៊ី​។
ហើយ​បើ​តាម​ព្រឹត្តប័ត្រ​នេះ ប្រាក់​ចំណូល​របស់​ NagaWorld ខាងលើ​ ត្រូវ​បានចុះ​ផ្សាយ​នៅ​លើ​ផ្សារ​ភាគហ៊ុន​​របស់​ក្រុង​ហុងកុង​។

បើ​តាម​ NagaWorld ប្រាក់​ចំណូលដ៏​សណ្ធឹក​សណ្ធាប់នេះ
បានមក​ដោយ​សារ​ស្ថេរភាព​នយោបាយ​​នៅ​កម្ពុជា ដែលជា​ប្រការ​បង្កើត​អោយ​មាន​នូវ​បរិបទ​​អំណោយ​ផល​
ដល់​ការរីក​ចំរើន​នៃ​វង់​ល្បែងនិង​សណ្ឋាគារ​​ទី ២ របស់​ NagaWorld (Naga 2) ។

មួយវិញទៀត ស្ថេរភាព​នយោ​បាយ​ក៏​ជា​កត្តា​អំណោយផល​ ដល់​វិស័យ​ទេសចរណ៍ ដែល​បាននាំ​មក​នូវ​ភ្ញៀវ​ប្រភេទ «VIP» (Very Important Person) ជា​ច្រើន​នាក់​ចូល​លេង​ល្បែង​នៅ​កាស៊ីណូ NagaWorld នៅក្នុង​រយពេល ៩ ខែ ដើម​ឆ្នាំ​នេះ​។ ហើយ​ក្នុង​ចំណោម​ភ្ញៀវ​ទេសចរណ៍​ទាំងនោះ ភ្ញៀវ​ចំនួន ១.៥ លាន​នាក់ មក​ពី​ប្រទេស​ចិន​។

ជាលទ្ធផល NagaWorld បាន​អោយ​ដឹង​ថា គំរោង​អគារ​វង់ល្បែង​ទី ៣ (Naga 3) នឹង​ត្រូវ​សង់​ឡើង​នៅ​​ក្នុង​តំបន់​អតីត «អគារបូឌីញស» ។ ​ហើយ​នៅពេល​បច្ចុប្បនេះ NagaWorld កំពុង​សំលឹង​រក​មើល​ក្រុម​ហ៊ុន​សាងសង់​ណា​មួយ ដែល​ពួ​ក​គេ​ទុក​ចិត្ត សំរាប់​សាងសង់​​​អគារវង់ល្បែង​ទី ៣ នេះ​៕

Related Articles