We TV Cambodia

កសិដ្ឋានផលិតអគ្គិសនីពីពន្លឺព្រះអាទិត្យនៅកំពង់ស្ពឺមានសមត្ថភាពអាចផលិតថាមពលឡើងដល់ ៨០ មេហ្កាវ៉ាត់

កសិដ្ឋានផលិតអគ្គិសនីពីពន្លឺព្រះអាទិត្យនៅកំពង់ស្ពឺមានសមត្ថភាពអាចផលិតថាមពលឡើងដល់ ៨០ មេហ្កាវ៉ាត់
រូបថតៈ Facebook អគ្គិសនីកម្ពុជា

ដោយៈ ទិន សុខាវុធ

កសិដ្ឋាន​ផលិត​ថាមពលអគ្គិសនីពី​ពន្លឺ​ព្រះ​អាទិត្យ​ដ៏​ធំ​មួយ លាត​សន្ធឹង​លើ​ផ្ទៃ​ដី ១១៥ ហិកតា​ ស្ថិត​​ក្នុង​ស្រុក​ឧដុង្គ​​ខេត្ត​កំពង់​ស្ពឺ ត្រូវ​បាន​បំពាក់​បន្ទះ​សូឡា​បន្ថែមទៀត ក្នុង​គោលបំណងធ្វើ​អោយ​កសិដ្ឋាន​មួយ​នេះ មាន​សមត្ថភាព​អាច​ផលិត​ថាមពលអគ្គិស​នី​បាន​រហូត​ដល់​ទៅ ៨០ មេហ្កាវ៉ាត់ ដើម្បី​ជៀសវាង​ការខ្វះខាតថាមពលអគ្គិសនី​នារដូវ​ប្រាំង​ខាងមុខនេះ​។

លោក កែវ​ រតនៈ អគ្គនាយកនៃ​អគ្គិសនីកម្ពុជា (EDC) បាន​ថ្លែង​ប្រាប់​អ្នកសារព័ត៌មានថា កសិដ្ឋាន​ផលិត​ថាមពល​អគ្គិសនីពី​ពន្លឺ​ព្រះ​អាទិត្យ​មួយ​នេះ កាល​ពី​ ៥ ខែ​មុន​ មាន​សមត្ថភាព​អាច​ផលិតថាមពល​អគ្គិសនី​បានចំនួនត្រឹមតែ ៦០ មេហ្កាវ៉ាត់​តែប៉ុណ្ណោះ​។ ក៏ប៉ុន្តែ បន្ទាប់​ពី​​ត្រូវ​បានបំពាក់​បន្ទះ​សូឡា​បន្ថែមទៀត កសិដ្ឋាន​មួយ​នេះ នៅ​ពេលបច្ចុប្បន្ន អាច​ផលិត​ថាមពល​អគ្គិសនី បាន​រហូត​ដល់​ទៅ ៨០ មេហ្កាវ៉ាត់ ពោលគឺ ២០ មេហ្កាវ៉ាត់​ច្រើន​ជាងមុន​។

យោង​តាម​ EDC សព្វថ្ងៃ​នេះ កម្ពុជា​មាន​កសិដ្ឋាន​ផលិត​ថាមពលអគ្គិសនីពីពន្លឺ​ព្រះ​អាទិត្យចំនួន​ ៤ កន្លែង​គឺ៖ កសិដ្ឋាន​ក្នុង​ខេត្ត​ពោធិសាត់​អាច​ផលិតថាមពលអគ្គិសនីបានចំនួន ៣០ មេហ្កាវ៉ាត់ កសិដ្ឋាន​ក្នុង​ខេត្ត​បាត់ដំបង ៦០ មេហ្កាវ៉ាត់ កសិដ្ឋានក្នុង​ខេត្តបន្ទាយ​មានជ័យ ៣០ មេហ្កាវ៉ាត់ និង​កសិដ្ឋាន​ក្នុង​ក្រុង​បាវិត ខេត្ត​ស្វាយ​រឿង​ ២០ ម៉េហ្កាវ៉ាត់​។

មួយវិញទៀត យោង​តាម​របាយ​ការណ៍​របស់​ EDC កាលពី​ឆ្នាំ ២០១៨ កន្លងទៅ​នេះ កម្ពុជា​មានសមត្ថភាព​អាច​ផលិត​ថាមពល​អគ្គិសនី​សំរាប់​តំរូវការ​ក្នុង​ស្រុក​បាន​ចំនួន​ប្រមាណ​ជា​ ២,៦៥០ មេហ្កាវ៉ាត់​។ ដោយឡែក ការនាំ​ចូល​ថាមពល​អគ្គិសនីពី​បណ្តា​ប្រទេស​ជិតខាង​មាន​ចំនួន ៤៤២ មេហ្កាវ៉ាត់​​។ ប្រទេស​ដែល​លក់​ថាមពលអគ្គិសនី​អោយ​កម្ពុជា​មានប្រទេស ថៃ វៀតណាម និង ឡាវ ៕

Related Articles