We TV Cambodia

កសិដ្ឋានបន្ទះសូឡាផលិតថាមពល ៣០ មេហ្កាវ៉ាត់ ត្រូវសង់រួចក្នុងឆ្នាំ ២០២១

កសិដ្ឋានបន្ទះសូឡាផលិតថាមពល ៣០ មេហ្កាវ៉ាត់ ត្រូវសង់រួចក្នុងឆ្នាំ ២០២១
រូបថតៈ សហការី

ដោយៈ ទិន សុខាវុធ

លោក វ៉ិចទ័រ ហ្សូណា អ្នកនាំពាក្យក្រសួងរ៉ែ និងថាមពល បានឲ្យដឹងថា ក្រសួង​របស់​លោក​កំពុង​ពិនិត្យលើទិដ្ឋភាពច្បាប់ នៃ​ការផ្ទេរសិទ្ធិអភិវឌ្ឍកសិដ្ឋាន​បន្ទះសូឡា​​មួយ ស្ថិត​ក្នុង​ខេត្ត បន្ទាយ​មានជ័យ ដែល​នឹង​ត្រូវ​សង់​ឡើង​នៅ​លើផ្ទៃ​ដីប្រមាណ​ជា ៤០ ហិកតា ហើយ​ដែល​នឹង​​មាន​សមត្ថភាព​អាចផលិត​ថាមពលអគ្គិសនីបាន​រហូត​ដល់​​ប្រមាណ​ជា​ ៣០ មេហ្កាវ៉ាត់​​។

ការពិនិត្យ​ការផ្ទេរសិទ្ធិ​នេះ ត្រូវ​បាន​ធ្វើឡើងបន្ទាប់ពី​ក្រុមហ៊ុន​ថៃ B.Brimm កាល​ពី​ខែ​ វិច្ឆិកា​ កន្លង​ទៅ​ បាន​សំរេច​ទិញ​ភាគហ៊ុន​ពី​ក្រុមហ៊ុន Ray Power Supply Co Ltd ក្នុង​តំលៃ​ ៣០០,០០០ ម៉ឺនដុល្លារ​។

តាមរយៈ​ការលក់​ភាគហ៊ុននេះ ក្រុមហ៊ុន B.Grimm នឹងមានសិទ្ធិ​សាងសង់​កសិដ្ឋាន​បន្ទះ​សូឡាមួយ​ នៅ​លើ​ផ្ទៃ​ដី​ទំហំ ៤០ ហិកតា ហើយ​ដែល​នឹង​មាន​សមត្ថភាព​អាច​ផលិត​ថាមពល​អគ្គិសនី​បានរហូត​ដល់​ទៅ ៣០ មេហ្កាវ៉ាត់ ស្ថិត​ក្នុង​ខេត្ត​បន្ទាយ​មាន​ជ័យ​។

គំរោង​កសិដ្ឋាន​បន្ទះ​សូឡា​នេះ​ នឹងត្រូវ​សង់​រួច​នៅ​ខែ​ តុលា ឆ្នាំ ២០២០ ខាង​មុខ​នេះ។ ហើយ​កសិដ្ឋានមួយ​នេះ​នឹងអាច​ដំណើរការ​ផលិត​ថាមពល​អគ្គិសនី​ក្នុង​ឆ្នាំ ២០២១ ។

បើតាមតួលេខ​របស់​រាជ​រដ្ឋាភិបាល រហូត​មកដល់​ពេលបច្ចុប្បន្ន​នេះ កសិដ្ឋានបន្ទះសូឡាពីរ​កន្លែង​កំពុងតែ​ដំណើរការផលិតថាមពល​អគ្គិសនីបានចំនួន​សរុប ៩០ មេហ្កាវ៉ាត់​។ ក្រៅ​ពីនេះ ​គំរោង​កសិដ្ឋាន​បន្ទះ​សូឡាចំនួន ៧ គំរោង​ទៀត​ ដែល​ត្រូវ​បានអនុម័ត​ដោយ​រាជ​រដ្ឋាភិបាល គ្រោងនឹងអាច​​ផលិត​ថាមពលអគ្គិសនី​សរុប​បាន​ចំនួន ៤១០ មេហ្កាវ៉ាត់ នៅ​ត្រឹម​ឆ្នាំ ២០២២ ៕

Related Articles