យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ចស្តីពីជំនួបរវាងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច ជាមួយលោកស្រី Carmen Moreno ឯកអគ្គរដ្ឋទូតនៃសហភាពអឺរ៉ុបប្រចាំកម្ពុជា តាមរយៈ Video Conference បានឲ្យដឹងថា សហភាពអឺរ៉ុបបានបង្វែរហិរញ្ញប្បទានឥតសំណងប្រមាណ ៦០លានដុល្លារជូនមករដ្ឋាភិបាលកម្ពុជាដើម្បីដោះស្រាយបញ្ហាដែលកើតឡើងដោយសារ COVID-19 ។
ក្នុងកិច្ចពិភាក្សាគ្នានេះ ឯកឧត្តម អូន ព័ន្ធមុនីរ័ត្ន បានលើកឡើងថា ក្នុងកាលៈទេសៈនេះកម្ពុជា ក៏ដូចជាពិភពលោកទាំងមូលកំពុងប្រយុទ្ធនឹងជំងឺ COVID-19 ហើយកម្ពុជាក៏បានគ្រប់គ្រងបញ្ហានេះបានយ៉ាងល្អផងដែរ និងមិនបន្ធូរដៃនោះទេលើការគ្រប់គ្រងជំងឺនេះ។ ប៉ុន្តែលោកក៏បានបន្ថែមថា ជំងឺ COVID-19 មិនត្រឹមតែជាវិបត្ដិសុខភាពសាធារណៈនោះទេ តែបង្កផលប៉ះពាល់អវិជ្ជមានដល់វិស័យសេដ្ឋកិច្ចផ្សេងៗ រួមមានវិស័យកាត់ដេរ ទេសចរណ៍ ធុរកិច្ចខ្នាតតូច និងមធ្យមផងដែរ។
ជាមួយគ្នានេះ លោកស្រី Carmen Moreno បានបញ្ជាក់ពីជំហរគាំទ្ររបស់សហភាពអឺរ៉ុបក្នុងការចូលរួមចំណែកគាំទ្ររាជរដ្ឋាភិបាលកម្ពុជា ដើម្បីស្ដារសម្បទាសេដ្ឋកិច្ច និងសង្គម ដែលរងផលប៉ះពាល់ពីវិបត្តិជំងឺ COVID-19 ។
គូសបញ្ជាក់ផងដែរថា ក្នុងការស្ដារសេដ្ឋកិច្ចឡើងវិញនេះ រដ្ឋាភិបាលកម្ពុជាបានបង្កើតក្រុមការងារចំនួន៤ រួមមាន៖ ក្រុមការងារចំពោះកិច្ចគ្រប់គ្រងការផ្គត់ផ្គង់ និងថ្លៃទំនិញយុទ្ធសាស្ត្រ, ក្រុមការងារចំពោះកិច្ចរៀបចំ និងគ្រប់គ្រងយន្តការជំនួយសង្គម, ក្រុមការងារចំពោះកិច្ចរៀបចំគោលនយោបាយថវិកា ហិរញ្ញប្បទាន និងជំនួយសង្គមដើម្បីគ្រប់គ្រងការប្រយុទ្ធនឹងជំងឺ COVID-19 និងក្រុមការងារបច្ចេកទេសចម្រុះ ចំពោះកិច្ចសិក្សារៀបចំដាក់ចេញកញ្ចប់វិធានការខាងរូបិយវត្ថុ និងធនាគារ ដើម្បីគ្រប់គ្រង និងដោះស្រាយផលប៉ះពាល់ពីការរីករាលដាលនៃជំងឺ COVID-19 និងការព្យួរប្រព័ន្ធអនុគ្រោះពន្ធលើមុខទំនិញមួយចំនួនក្នុងក្របខណ្ឌ EBA៕
អត្ថបទដោយ៖ Nevin
ប្រភព៖ ក្នុងស្រុក
